Kuch dinon baad shuru hojaega 2023 ka aakhri padaav yaani ham sabka pasandida December ka maheena! Ab dilli ki kanpa dene waali sardi ke kisse toh aapne sune hi honge lekin iska ye matlab bilkul nahi hai ki is saal ka ant aap apni razai mein dubakkar hi karein. Agle mahine dilli host karne ja raha hai kuch aise events jo kabhi aapko pet pakad kar hansne par toh kabhi maze se jhoomne par majboor kar denge. Chaliye aaj baat karte hain aise hi 5 amazing events ki, 

1. Kisi Ko Batana Mat Ft. Anubhav Singh Bassi

1 december se 7 january tak hone ja rahe is stand up comedy show ko sirf 16 saal se zyaada umar ke log hi attend kar sakte hain. Ismein mashhoor comedian anubhav singh bassi delhi mein alag alag jagahon par logon ko apne mazedar andaaz mein gudgudaaenge. Mahine ki shuruaat karne ka isse achha tareeka kya ho sakta hai. Date Night ho ya family dinner, ye show aap kabhi bhi enjoy kar sakte hain. 

2. Horn OK Please 

1 se 3 december tak Jawaharlal Nehru Stadium mein hone ja raha ye food festival din ke 12 baje se raat ke 10 baje tak  chalega. Yahan puraani dilli ki sadkon se nikal kar south delhi ke posh cafes tak, aapko milega sabka swaad. North Indian Zone, World Food Zone, Asian Zone,Continental Zone, or Desert Zone, aapki taste buds ko milega ek savory delight! Yahi nahi, balki cocktails, band performances, or flea market se aapki sham mein lag jaayenge chaar chaand. 

3. Pet Fed 

Is saal apne pets ko bhi dijiye much-needed pampering! NSIC Exhibition Grounds, Okhla mein hone ja raha hai India ka sabse bada pet festival, PET FED. 16 or 17 december ko yhn hoga international cat show, fashion show, police dog show, adoption camps, exciting games or lagenge 150 se bhi zyaada global pet stalls. Aap bina kisi pet ke bhi is event ka part ban sakte hain. 

4. The Great Indian Sneaker Festival 

Agar aap bhi hain ek sneakerhead toh 22 se 24 december tak kar lijiye apna schedule book! Gurugram ke ambiance island mein din ke 12 baje se raat ke 10 baje tak hoga Indian Sneaker Festival. 3000 se bhi zyaada limited or exclusive sneakers ke saath saath streetwear, delicious recipes, or live performances ka bhi lijiye maza. 

5. Gurdaas Maan Live

2024 ki shuruaat kariye bhaarat ke mashhoor singer gurdaas maan ke saath. Ji haan, “dil da maamla hai” se lekar “ishq da gidda” tak ka safar tay kar chuke gurdas 31 december ko Gurgaon ke crowne plaza mein live perform karenge. Toh jhoom jaaiye unke saath bhaangda par or saath mein delicious cuisine or drinks denge aapko best company. 

2023 chaahe aapke liye mushkilon bhara raha ho ya aapne bht saari meethi yaadein banaayi hon, zaruri hai use ek happy ending dene ki. Inmein se kisi bhi event ka hissa bankar aap naye saal ke liye apne aap ko warm-up bhi kar sakte hain. Or haan, lautkar hame apna experience bhi zarur bataayein.